ٿيٻو خطائي

خطائي ٿيٻو : ”خطائي“ جو اصل نالو جاڙو خان ولد سالار ٿيٻو آهي. هن 8 آڪٽوبر 1975ع تي ساماري روڊ شهر ۾ جنم ورتو. نئين ٽهيءَ جو سٺو شاعر ۽ ليکڪ آهي. ايم. اي ۽ ايل. ايل بي ڪيل اٿس. هي سنڌي ادبي سنگت ساماري روڊ جو باني ڪارڪن رهيو آهي، سنڌي ادبي سنگت جي پليٽ فارم تان ڪيترا ادبي پروگرام ڪرائي چڪو آهي ۽ سنڌي ادبي سنگت عمرڪوٽ جو رابطه سيڪريٽري رهيو آهي. هن جي شاعري مختلف اخبارن ۽ رسالن ۾ شايع ٿيندي رهندي آهي. سندس شاعريءَ جا ٻه ڪتاب ”ٻڌايو ڪجي ڇا؟“ (1997ع) بزم ادب صوفي فقير پاران ۽ ”سانجهه جي هنج ۾“ شاهه لطيف اڪيڊمي، عمرڪوٽ طرفان 2007ع ۾ شايع ٿيو آهي. تازو 21-20 فيبروري 2010ع تي ڊي سي او عمرڪوٽ پاران ٿيل ”عمرڪوٽ سيمينار“ جي موقعي تي پڌري ڪيل ٽن مان ٻن ڪتابن ”ڪوي عمرڪوٽ جا“ ۽ ”عمرڪوٽ ايامن کان“ ۾ سهڪاري رهيو آهي. هن کي بهترين غزل گو شاعر جو سنڌ گريجوئيٽس ايسوسيئيشن مرڪز پاران 2001ع ۾ ايوارڊ ملي چڪو آهي. عمرڪوٽ ٽائون ڪميٽيءَ ۾ ڪلرڪ آهي ۽ ڳوٺ ولي محمد ٿيٻي تعلقي عمرڪوٽ ۾ رهائش پذير آهي.

داخلا ۾ استعمال ٿيل تاريخون

1975.10.08  عيسوي

خطائي ٿيٻو 8 آڪٽوبر 1975ع تي ساماري روڊ شهر ۾ جنم ورتو

شاعر - ڀاڱي جون ٻِيون داخلائون